NELSPRUIT, MPUMALANGA. – ’n Man (56) bly in aanhouding nadat hy Woensdag in die Bushbuckridge-landdroshof op ‘n aanklag van die beweerde verkragting van sy stiefkleindogter verskyn het.
Die verdagte is Dinsdag in hegtenis geneem nadat hy die slagoffer glo Maandagaand verkrag het.
Na bewering het die slagoffer se ma gesien hoe haar dogter halfnaak uit die stiefoupa se kamer gekom het. Die slagoffer het haar ma van die gebeure vertel, waarna die ma ’n saak by die Bushbuckridge-polisiekantoor aanhangig gaan maak het.
As deel van die voorlopige ondersoek is die slagoffer na ’n mediese fasiliteit geneem.
Die verdagte bly in aanhouding tot sy volgende hofverskyning op 9 Januarie 2024. Na verwagting behoort hy dan regsverteenwoordiging te hê.
Lt. genl. Semakaleng Daphney Manamela, provinsiale kommissaris van die SAPD, het die voorval ten sterkste veroordeel, veral aangesien die beweerde misdaad deur iemand naby aan die slagoffer gepleeg is.
Bronne: SAPD, Twitter
