WES-KAAP. – ‘n Man (51) en sy vrou (42) van die Paarl is 16 keer lewenslank deur die streekhof tronk toe gestuur. Daarbenewens is nog 12 jaar direkte gevangenisstraf bygevoeg nadat hulle op agt aanklagte van verkragting, agt aanklagte van mensehandel en vier aanklagte van die seksuele voorbereiding van kinders skuldig bevind is. Die hof het gelas dat die vonnisse gelyktydig uitgedien word, wat neerkom op lewenslange gevangenisstraf vir albei beskuldigdes.
Eric Ntabazalila, NVG-woordvoerder, sê die egpaar het twee kwesbare 14-jarige meisies uit haglike omstandighede geteiken. Een slagoffer se ma is oorlede, terwyl haar pa met alkoholmisbruik geworstel het. Die ander slagoffer se gesin het hul huis in ‘n brand verloor en moes onder ‘n brug skuiling soek. Die egpaar het albei meisies in hul huis ingeneem en sodoende ‘n verhouding van afhanklikheid en vertroue geskep.
Streekaanklaer Jacqueline Hefele het getuienis voorgelê wat toon dat die slagoffers vir kos, klere en skuiling van die egpaar afhanklik was. Die vrou het na bewering aan die meisies voorgestel dat hulle seksuele omgang met haar man moet hê, in ruil vir finansiële ondersteuning en huisvesting. Die egpaar het die minderjariges van alkohol voorsien voordat hulle herhaaldelik seksueel misbruik is. Getuienis het getoon dat die vrou dikwels teenwoordig was tydens die aanrandings en aktief gehelp het om dit te fasiliteer. Die misbruik was volgens die hof stelselmatig en het ‘n geruime tyd voortgeduur.
In hul verdediging het die twee beskuldigdes probeer om die skuld op mekaar te blameer. Die hof het albei weergawes verwerp. Die slagoffers se getuienis, wat as konsekwent en geloofwaardig beskou is, is verder gestaaf deur ‘n buurman wat uitlatings gehoor het wat die vrou tydens ‘n rusie gemaak het. Die hof het bevind dat die staat sy bewyslas oortuigend nagekom het, en albei beskuldigdes op al die aanklagte skuldig bevind.
Die beskuldigdes se name word in die nasionale register vir seksuele misadigers aangebring. Hulle is ook onbevoeg verklaar om vuurwapens te besit. Die nasionale vervolgingsgesag (NVG) het die identiteit van die egpaar weerhou om die twee minderjarige slagoffers te beskerm en verdere viktimisering te voorkom.
