Switserland stem vandag in ‘n referendum oor of die land se bevolking teen 2050 tot 10 miljoen mense beperk moet word. Die voorstel, wat deur die regse Switserse Volksparty (SVP) gerugsteun word, vereis die regering moet ingryp sodra die permanente inwonertal 9,5 miljoen oorskry, veral op die gebied van asiel en gesinshereniging.
Indien die bevolking 10 miljoen oorskry, sal Switserland sy ooreenkoms met die Europese Unie oor die vrye beweging van mense binne twee jaar moet beeïndig. Die land se bevolking staan tans op sowat 9,1 miljoen, met buitelanders wat ongeveer ‘n kwart uitmaak.
Voorstanders beskryf die maatreël as ‘n volhoubaarheidsinisiatief wat druk op behuising, vervoer en dienste sal verlig. Teenstanders waarsku dit kan die ekonomie skaad, arbeidstekorte vererger en bande met Europa verswak. Sommige het die stemming ‘n “Switserse Brexit” genoem. ‘n Onlangse peiling het getoon die openbare mening draai teen die voorstel. Uitslae word later vandag verwag.
