Die gewilde Suid-Afrikaanse sangeres Tasché Burger en Jo-Lene het Donderdag ‘n nuwe toevoeging tot hulle gesin verwelkom. ‘n Pragtige babadogter is vir hulle by Mediclinic Louis Leipoldt in die Kaap gebore.
Tasché het die nuus op sosiale media gedeel: “Beste dag van ons lewe by een van die beste hospitale in die wêreld! Liede het skapies getel terwyl ons slapies afgetel het.” Sy het ook foto’s en video’s van hul pasgeborene op haar Facebook Story gedeel.
Mediclinic Louis Leipoldt het die Burger-gesin op hul eie Facebook-bladsy gelukgewens en ‘n besondere tradisie uitgewys – nuwe ouers hys ‘n vlag om die geboorte van hul baba te vier. Tasché het trots ‘n pienk vlag gehys ter ere van hulle babadogter se koms. Wat die geleentheid nog meer spesiaal maak, is dat Tasché self ook by dieselfde hospitaal gebore is, waar ‘n pienk vlag destyds deur haar ouers gehys is.
Tasché is wyd bekend as lid van die Suid-Afrikaanse popgroep BlackByrd en as wenner van The Voice SA in 2019.
