WENE. – Die prokureur van een van die drie verdagtes wat in verband met die terreurkomplot by Taylor Swift se Wene-konserte gearresteer is, het die aanklagte teen sy kliënt as “oordrewe” bestempel. Werner Tomanek, wat die 19-jarige verdagte verteenwoordig, het gesê sy kliënt het nie die “middele, moontlikhede of ontploffingsmiddels “ gehad het om dit uit te voer nie.
Volgens berigte het die tiener beplan om deur die stadion se omheining te jaag, met die doel om soveel as moontlik mense met messe en tuisgemaakte plofstowwe dood te maak. Oostenrykse polisie het ook chemiese stowwe en tegniese toestelle in die verdagte se huis gevind. Tomanek het die aanklagte as “oordrewe” beskou en die owerhede daarvan beskuldig dat hul publisiteit soek om hul ondersoek te bevorder.
Tomanek het aan die Oostenrykse persagentskap gesê dat hy nog nie toegang tot die polisielêers gehad het nie, maar betwis dit dat sy kliënt se aanvanklike verklaring volledig was. Hy het sy kliënt, wie se identiteit weens privaatheidsredes nie deur die Oostenrykse owerhede bekend gemaak is nie, beskryf as ‘n alleenloper sonder enige sosiale kontakte en die beweerde aanvalsplanne as “suiwer fantasie” van iemand wat geestesprobleme het, beskryf.
Benewens die 19-jarige, is twee ander tieners in verband met die saak in hegtenis geneem. Oostenryk se minister van binnelandse sake, Gerhard Karner, het bevestig dat die derde verdagte, ‘n 18-jarige wat later gearresteer is, “nie direk gekoppel is aan die aanvalsplanne” nie. Die hoofverdagte en ‘n 17-jarige is die Dinsdag voor die geskeduleerde konserte sou plaasvind, in hegtenis geneem.
