WES-KAAP. – Die polisie het tien verdagtes in hegtenis geneem ná ’n ondersoek na ’n afpersingsaak wat by die Murraysburg-polisiekantoor aangemeld is. Die sewe mans en drie vroue, tussen 35 en 64 jaar oud, is op 31 Oktober tydens ‘n operasie in Graaff-Reinet in hegtenis geneem.
Volgens sers. Christopher Spies, polisiewoordvoerder, het die voorval op 23 September tydens ‘n vergadering deur ’n windenergie-maatskappy in Pastoriestraat, Murraysburg, plaasgevind. ’n Groep persone het glo dreigemente teen die maatskappy se verteenwoordiger gemaak en gedreig om vragmotors wat komponente vir windturbines na die konstruksieterrein vervoer, aan die brand te steek. Inhegtenisnemings is gemaak, waarna die verdagtes van afpersing en intimidasie aangekla is. Die 10 verdagtes sal vandag in die Beaufort-Wes-landdroshof voorkom.
Spies, sê die inhegtenisnemings is deel van voortdurende pogings om afpersingsgroepe wat die streek se ekonomie bedreig, tot niet te maak. Hy het bygevoeg dat meer inhegtenisnemings, soos die ondersoek voortduur, nie uitgesluit kan word nie.
