GAUTENG. – ’n Polisiesersant van Brakpan het Maandagmiddag omstreeks 16:30 eers sy vrou noodlottig gewond, twee kinders, skoonma en huiswerker beseer en daarna sy eie lewe geneem.
Lizzy Suping, Opod-woordvoerder, sê in ‘n verklaring die tragedie het glo tydens huishoudelike konflik plaasgevind. Die stasiebevelvoerder by Brakpan-polisiekantoor het die sersant, wat met ‘n werksopdrag in die Tsakane-gebied was, gekontak en hom in kennis gestel dat daar ’n beskermingsbevel teen hom bedien moes word wat sy vrou bekom het. Die stasiebevelvoerder het ook versoek dat die sersant sy vuurwapen by die polisiekantoor inhandig en ‘n bewys daarvan verskaf.
Ná ’n ontmoeting met die polisiebestuur by die stasie het die vrou besluit om by haar ouers se huis in Brakpan te oornag. Die sersant het na bewering die vrou na haar ouerhuis gevolg en skote geskiet wat haar dood veroorsaak het. Twee kinders, 15 en 13 jaar, die vrou se moeder en hul huiswerker is ook beseer. Al die oorlewendes is na verskeie mediese sentrums geneem vir behandeling.
Ná die voorval het die sersant met sy voertuig van die misdaadtoneel gevlug. Hy is deur middel van ‘n opsporingstoestel in Secunda, Mpumalanga, gekry. Toe hy glo besef kollegas is op sy spoor, het hy homself om die lewe gebring.
Op die Brakpan-misdaadtoneel is 15 patrone, agt koeëlsplinters, een lewendige koeël en twee 5-liter petrolkanne gevind.
