LEES OOK: Nege beseer toe skeepsvraghouer polisievangwa in Kaapstad platval
Siza Mzimela, die uitvoerende hoof van Transnet Freight Rail (TFR), het bedank na ‘n ampstermyn van drie jaar te midde van uitdagings wat die spoorvervoermaatskappy in Suid-Afrika ondervind.
In ‘n brief aan die personeel het Mzimela die vooruitgang wat gedurende haar ampstermyn gemaak is beklemtoon en die personeel vir hulle toewyding bedank. “Vandag is ek bly dat ek die geleentheid gehad het om so baie van julle, wat meer as 26 000 hardwerkende TFR-werknemers uitmaak, persoonlik te kon ontmoet,” het sy gesê.
Mzimela het die afgelope vier weke onder geweldige druk van die Transnet-direksie gekom om te bedank. TFR het swak gevaar tydens haar ampstermyn, met uitvoervolumes wat tot die laagste vlakke in jare gedaal het. Beide sake- en georganiseerde arbeid het hulle vir haar verwydering beywer.
Die gevolg van Transnet se mislukking was dat die mynbousektor ‘n opbloei in uitvoerkommoditeite misgeloop het terwyl ander lande die geleentheid gebruik het. Die Mineraleraad het beraam dat SA-maatskappye R100 miljard se inkomste verbeur het, wat tussen R40 miljard tot R50 miljard se belastinginkomste vir die staat is.
Mzimela is vroeg in 2020 deur Transnet se uitvoerende hoof, Portia Derby, aangestel. Derby het verlede week bedank, ook nadat sy onder druk van die direksie gekom het. Onder Derby en Mzimela het ‘n groot aantal bekwame en ervare personeel die organisasie verlaat deur ‘n vrywillige skeidingsreëling wat hulle ingestel het.
Pravin Gordhan, minister van openbare ondernemings, wat Derby aangestel het, het Mzimela vroeër vandeesweek as “relatief nuut in die spoorsektor” beskryf en gesê daar is meer vaardige en ervare mense wat die werk kan doen. Die maatskappy is ook in finansiële moeilikheid met R130 miljard se skuld wat nie uit die TFR se inkomste kan betaal word nie.
#Transnet #Bedanking #UitvoerendeHoof #CEO #Nuus
