WES-KAAP. – Verkeer op die R60 deur Robertson en Ashton sal tydelik geraak word weens die vervoer van groot windturbine-onderdele, met die beplande konvooie wat vandag en Donderdag deur die gebied sal beweeg. Die onderbrekings vind tot Julie 2026 weekliks plaas. Elke konvooi bestaan uit minstens drie vragmotors wat oor sowat drie kilometer strek en ongeveer 20 minute neem om deur ’n dorp te beweeg.
Luidens ‘n verklaring van die Langeberg-munisipaliteit behoort die konvooi na verwagting omstreeks 13:00 by Wolseley aan te kom en tussen 14:00 en 18:00 Robertson binne te ry. Die tyd is nog nie finaal bevestig nie. Die vervoer van die windturbine-onderdele volg op ’n aansoek deur Superload (Edms) Bpk vir die vervoer vanaf Saldanhabaai na Swellendam as deel van ’n hernubare-energie-ontwikkeling. Dit behels die vervoer van komponente vir 39 windturbines, met een of meer stelle wat weekliks in ’n konvooi vervoer word. Provinsiale verkeersdienste sal die konvooi begelei, met die ondersteuning van Langeberg- munisipale-verkeersdienste. Die teenoorgestelde baan sal oop bly en kruisverkeer sal deur verkeersbeamptes bestuur word.
Presiese datums en tye sal een week vooraf op die Langeberg-munisipaliteit se webwerf, sosiale media en WhatsApp-kanaal bekend gemaak word. Die vervoer van die windturbine-onderdele sal nie gedurende die Double Century-fietswedren plaasvind nie.
Druk hier om meer te lees.
