KWAZULU-NATAL. – ‘n Verdagte (56) is vandag (Donderdag) op ‘n plaas in Camperdown deur owerhede in hegtenis geneem. Dagga en produkte ter waarde van R30 miljoen en ses onwettige vuurwapens en ammunisie is glo in sy besit gevind.
Lt.kol. Simphiwe Mhlongo, polisiewoordvoerder, sê in ‘n verklaring die polisie het inligting oor die plaas en sy onwettige bedrywighede ontvang. Tydens ‘n operasie op die plaas is 4 165 daggaplante, 70 emmers verwerkte dagga en parafernalia ter waarde van ongeveer R30 miljoen gevind. Daar is ook op ses vuurwapens en meer as 165 rondtes ammunisie beslag gelê.
Die polisie se forensiese wetenskapslaboratorium is na die misdaadtoneel ontbied, waar daar vir bewysstukke gefynkam is. Die verdagte staan op aanklagte van die kweek van dagga, handel in dagga, asook die onwettige besit van vuurwapens en ammunisie tereg. Ballistiese toetse op die vuurwapens sal bepaal of dit in misdade gebruik is.
Die verdagte sal na verwagting binnekort in die Camperdown-landdroshof verskyn.
