KWAZULU-NATAL. – Twee verdagtes is vanoggend (Dinsdag) deur die polisie in Edendale doodgeskiet. Hulle is glo met Maandag se gewapende transitoroof in Verulam verbind. Die voorval het in die Nhlazatshe-gebied in Shayamoya, Edendale, plaasgevind.
Kol. Robert Netshiunda, polisiewoordvoerder, sê minstens 12 verdagtes het Maandagmiddag ’n geldwa op die hoek van Jabu Ngcobo- en Fairviewweg in Verulam tot stilstand gedwing. Die verdagtes het glo drie vuurwapens by veiligheidswagte afgeneem en met ’n onbekende bedrag geld gevlug.
Kort ná middernag het die polisie inligting ontvang dat sommige van die verdagtes in Edendale skuil. Toe die polisie by die betrokke woning opdaag, het ’n skietgeveg uitgebreek. Twee verdagtes is doodgeskiet, terwyl ’n derde daarin geslaag het om te vlug. Drie vuurwapens, twee gewere en ’n handwapen, asook verskeie rondtes ammunisie, is op die toneel gevind. ’n VW Polo wat glo in die roof gebruik is, is ook gekry. In die motorhuis is ’n bakkie met verskeie nommerplate aangetref.
Geen polisielid is tydens die skietgeveg beseer nie. Die soektog na die oorblywende verdagtes duur voort.
