GAUTENG. – Twee verdagtes is in hegtenis geneem in verband met ’n skietvoorval Saterdag in Eldoradopark, waartydens twee mense doodgeskiet en ses ander gewond is. Die verdagte mans, albei 23 jaar oud, is deur die polisie se teen-bende-eenheid aangekeer en sal na verwagting vandag in die hof verskyn.
Brig. Brenda Muridili, provinsiale polisiewoordvoerder, sê die voorval het omstreeks 22:30 plaasgevind toe gewapende mans glo by ‘n sosiale byeenkoms aangekom en lukraak op mense geskiet het, voordat hulle te voet van die toneel weg is. Twee mense is op die toneel dood verklaar, terwyl ses ander met skietwonde na hospitale geneem is.
Verskeie eenhede het ná die voorval onmiddellik begin om na die verdagtes te soek. Een van die verdagtes het hom Maandag saam met sy prokureur by die Eldoradopark-polisiekantoor oorgegee, terwyl die tweede by sy woning in die gebied in hegtenis geneem is. Die twee verdagtes sal op aanklagte van twee moorde en ses pogings tot moord in die Lenasia-landdroshof voorkom.
Die polisie-ondersoeke na die voorval duur voort.
