GAUTENG. – Die verhoor van Vusimuzi “Cat” Matlala en vier medebeskuldigdes het Maandag in die Johannesburg-hooggeregshof in Gauteng afgeskop. Al vyf beskuldigdes het onskuldig gepleit. Die saak is tot Dinsdag 21 Julie uitgestel wanneer die staat na verwagting sy eerste getuie sal roep.
Magaboke Mohlatlole, NVG-woordvoerder, sê Matlala, Tsakani Matlala, Musa Kekana, Tiego Floyd Mabusela en Zandile Nthabiseng Nzama staan tereg op 25 aanklagte wat voortspruit uit drie beweerde pogings tot moord wat tussen Augustus 2022 en Januarie 2024 plaasgevind het. Die saak hou verband met die skietvoorvalle waarin die taxi-sakeman Madoda Johannes Sibanyoni, en vier ander- die aktrise Tebogo Thobejane en twee ander, asook die musikant Austin Seunkie Mokubong, beter bekend as DJ Vetty, asook twee ander – na bewering geteiken is. Die beskuldigdes staan ook tereg op aanklagte van sameswering om moord te pleeg, die onwettige besit van verbode vuurwapens en ammunisie, geldwassery, bedrog en verydeling van die regsproses.
Volgens die NVG voer die staat aan dat geld deur verskeie bankrekeninge beweeg is om vir sommige van die beweerde misdade te betaal. Daar word ook beweer dat dokumente vervals is om die oorsprong van die geld en die beweerde betalings te verdoesel. Die NVG sê die vervolging is gereed om sy saak aan te hoor en sal onder meer getuienis, forensiese en ballistiese bewyse, asook selfoon- en ander digitale bewyse aan die hof voorlê.
