VSA. – Michele Hundley Smith, wat in Desember 2001 spoorloos verdwyn het, is ná 24 jaar lewend opgespoor.
Die kantoor van die Rockingham County Sheriff in Noord-Carolina het bevestig dat speurders haar op 20 Februarie opgespoor het. Sy geniet glo goeie gesondheid en haar huidige ligging bly op haar versoek onbekend.
Smith was 38 jaar oud toe sy haar huis in die Eden-omgewing verlaat het om Kersinkopies in Martinsville, Virginia, te gaan doen. Sy het nooit teruggekeer nie en is op 31 Desember 2001 as vermis aangemeld.
Haar dogter Amanda, wat 14 was toe haar ma verdwyn het, het op sosiale media gesê sy voel “ekstaties, kwaad en hartseer – alles deurmekaar”. Sy sê sy weet nie of daar weer ’n verhouding tussen hulle sal wees nie.
Volgens die balju, Sam Page, is daar geen bewerings van misdaad nie. Smith het glo gesê sy is destyds weens huishoudelike probleme weg, maar daar is geen amptelike rekords daarvan nie. Die saak word nou met die aanklaer bespreek om te bepaal of enige aanklagte oorweeg sal word.
