MPUMALANGA. – Dr. Nicholas James Procter (40) is op 1 Februarie deur sy familie as vermis aangemeld. Sy liggaam is dieselfde dag in ‘n woonstel in die Green Valley-veiligheidskompleks ontdek.
Volgens kol. Donald Mdhluli het Siyabonga Kekane (20), Nkateko Tshidzumba (25) en Bheki Ndlovu (38), wat Maandag vir moord in hegtenis geneem en aangekla is, gister in die Nelspruit-landdroshof verskyn. Die trio se borgaansoek is tot 14 Februarie uitgestel en hulle bly in aanhouding.
Nadat Procter, ‘n narkotiseur van Sonheuwel in Mbombela (Nelspruit), se liggaam ontdek is, het ‘n span ondersoekers onverpoosd gewerk en die drie verdagtes in Protea Glen, Johannesburg vasgetrek.
Volgens Die Laevelder is Procter as vermis aangemeld toe hy nie vir werk opgedaag het nie. Daar is tevergeefs na die dokter by die Elawini-brug, waar sy voertuig gevind is, gesoek. Nadat inligting opgevolg is, is sy liggaam die middag na 16:00 in ‘n woonstel gevind. Sy hande en voete was vasgebind. Hy is deur Emer-G-Med op die toneel dood verklaar.
Volg FiND iT se Facebookblad hier en klik hier om ons app af te laai. Klik hier vir vandag se nuutste nuus.
