KWAZULU-NATAL. – Twee mans is Dinsdagmiddag in Phoenix dood nadat onbekende aanvallers verskeie skote in ‘n vermoedelike geteikende aanval op hul voertuig geskiet het. Die aanval is deur geslotekring-televisie (CCTV) vasgelê.
Volgens Reaction Unit South Africa (Rusa) het die organisasie se Phoenix- operasionele sentrum omstreeks 16:15 verskeie oproepe van omliggende ondernemings ontvang nadat aanhoudende geweervuur in die gebied gehoor is. Reaksiebeamptes is onmiddellik na die toneel ontbied. Met hul aankoms het hulle ‘n wit Ford Bantam langs die pad met twee mans in die voertuig aangetref. Albei het veelvuldige skietwonde opgedoen en is deur paramedici dood verklaar.
Rusa sê ondersoek op die toneel het getoon dat verskeie skote met hoëkaliber-vuurwapens en 9 mm-pistole geskiet is. Verskeie leë doppies is as bewysstukke op die toneel opgetel. Volgens die beeldmateriaal het ‘n wit sportnutsvoertuig langs die Ford Bantam stilgehou, waarna die insittendes op die voertuig losgebrand het. Die verdagtes het kort daarna van die toneel weggejaag.
Die identiteit van die oorledenes was teen publikasietyd nog onbekend en die motief vir die skietaanval word ondersoek.
