GAUTENG. – Manyaba Rubben Mohlaloga, ‘n voormalige voorsitter van die parlementêre portefeuljekomitee oor landbou en grondsake, van 2007 tot 2009, is beveel om gister vir tronkstraf aan te meld. Mohlaloga moet 20 jaar tronkstraf uitdien. Die vonnis is reeds op 14 Febuarie 2019 opgelê.
Kol. Katlego Mogale, Valke-woordvoerder, sê die saak spruit voort uit ‘n ondersoek wat in 2012 begin is, nadat R6 miljoen gedurende 2008 onreëlmatig, op die instruksie van die destydse uitvoerende hoof van die Landbank, sonder die nodige goedkeuringsprosesse, aan ‘n entiteit betaal is. Die saak is deur die Landbank by die Valke aangemeld. Die bank was verantwoordelik vir die bestuur van die AgriBEE-fonds ter waarde van R100 miljoen, wat deur die parlement bewillig is om die bemagtiging van voorheen benadeelde boere te bevorder.
Mohlaloga, wat destyds as komiteevoorsitter opgetree het, het persoonlik voordeel uit die onwettige betaling getrek en is in 2019 skuldig bevind aan bedrog en geldwassery. Sy appèlle by die Hooggeregshof en die Hoogste Hof van Appèl was onsuksesvol en sy poging om borgtog te verleng is op 16 September aangehoor en op 13 Oktober van die hand gewys.
Lt.genl. Patrick Mbotho, die waarnemende nasionale hoof van die Valke, het die ondersoekspan geprys en gesê: “Hierdie saak toon dat die Valke vasbeslote bly om dié wat hul mag misbruik, tot verantwoording te roep.”
