WES-KAAP. – Twee mense is dood en twee ander is na ‘n hospitaal geneem nadat ’n munisipale vulliswa van Bitou vanoggend in ’n ongeluk betrokke was en in die strandmeer net buite Knysna beland het.
Volgens Andile Namntu, Bitou-munisipaliteit se woordvoerder, is nooddienste op die toneel. Die Garden Route-distriksmunisipaliteit se brandweerdiens is deur Knysna-munisipaliteit se brandweerdiens ontbied om te help met die hantering van ’n gevaarlike materiaal wat ná die ongeluk gemors het.
Die ongeluk het op die N2/Lagoonweg plaasgevind en verkeer in albei rigtings word geraak. Motoriste word gemaan om vertraging te verwag, ekstra reistyd toe te laat en versigtig te bestuur wanneer hulle die gebied nader. Daar is tans geen aanduiding wanneer die pad weer volledig oopgestel sal word nie.
Die oorsaak van die ongeluk is nog onbekend. Verdere besonderhede sal bekend gemaak word soos dit beskikbaar raak.
Bronne: Bitou Municipality, Garden Route District Municipality, Knysna Municipality
