OOS-KAAP. – ‘n Vrou (54) wat na bewering ‘n onwettige apteek en mediese praktyk in ‘n woonhuis in Duncan Village in Oos-Londen bedryf het is deur owerhede in hegtenis geneem.
Brig. Nobuntu Gantana, polisiewoordvoerder, sê nadat inligting ontvang is, is ‘n operasie Maandagoggend vroeg deur verskeie eenhede uitgevoer. Tydens die klopjag is ’n groot hoeveelheid medikasie, inspuitings, ’n kaartmasjien en kontant gekonfiskeer, ter waarde van sowat R85 500. Die vrou word van die onwettige besit van medisyne en die beoefening van mediese dienste sonder registrasie aangekla. Sy bly in aanhouding.
Die saak word verder ondersoek en die beskuldigde sal binnekort in die Oos-Londen-landdroshof verskyn.
