INTERNASIONAAL. – ’n Man In Neuville‑sur‑Saône, naby Lyon, Frankryk, het ‘n gat vir ‘n swembad in sy tuin begin grawe en op ’n versameling goue stawe en munte ter waarde van sowat R14 miljoen (ongeveer €700 000 of US $800 000) ontdek. Die vonds is volgens mediabronne Donderdag deur plaaslike owerhede bevestig.
Die ontdekking van vyf goue stawe en verskeie munte, almal in plastieksakke verpak. is reeds in Mei 2025 gemaak. Dis aan die owerhede, insluitend die streeksdirekteur vir kulturele sake, verklaar. Owerhede het bepaal dat die goud nie van argeologiese betekenis is nie en blykbaar 15 tot 20 jaar gelede by ’n smeltery naby Lyon gesmelt is. Omdat daar geen eisers vorendag gekom het nie en die vorige eienaar van die eiendom oorlede is, is die huidige eienaar volgens Franse wet toegelaat om die skat te hou.
Die oorsprong van die goud bly onbekend en ondersoeke duur voort.
Bronne: France24 AFP, The Connexion, The Independent en The Brussels Times
