KENIA. – ‘n Seekoeikalf, nog nie ‘n maand oud nie, is Saterdag gered nadat lede van die Kenya Wildlife Service (KWS) hom hulpeloos teen die liggaam van sy dooie ma aangetref het. Dit het vaardigheid vereis om die babakalf te red in die emosionele situasie by die Oloiden Resort naby Naivasha.
Volgens die KWS se sosialemediaplasing het die kalf se ma glo aan natuurlike oorsake gesterf en het reeds meer as ‘n dag lank gelê toe die reddingspan op die toneel aangekom het. Die seekoeikalf het hom teen haar liggaam vasgedruk en sagte kermgeluide gemaak, onbewus van haar dood, maar bewus van die stilte waar warmte en beskerming eens was.
Die KWS se veearts- en reddingspan was naby Kedong Ranch besig met ‘n massa-hervestigingsoperasie toe hulle die noodoproep ontvang het. Met die kalf wat elke keer nader aan sy ma gegaan het soos die span naderkom, moes hulle die pynlike besluit neem om die moeder se liggaam as die enigste anker te gebruik om die kalf veilig nader te kry en te red. Die kalf is daarna aan die Sheldrick Wildlife Trust vir gespesialiseerde sorg en rehabilitasie oorhandig.
