KWAZULU-NATAL. – ‘n Werker is vroeër vandag kritiek beseer toe ‘n sandwal op ‘n bouperseel in Ballito op hom ingetuimel en hom vasgekeer het.
Samantha Meyrick sê reddingspanne van IPSS Medical Rescue en IPSS Search & Rescue is ná 11:00 na die toneel ontbied waar die man lewend, maar vasgekeer, aangetref is. Hy is op die toneel deur gevorderde lewensondersteuningspersoneel behandel terwyl spanne, saam met die KDM-brandweer en bouwerkers, meer as ’n uur lank gewerk het om hom te bevry.
Die man is daarna gestabiliseer en na ’n gespesialiseerde hospitaal in Durban vervoer.
