WES-KAAP. – Nadat groot hoeveelhede dooie wit mossels en ander skulpdiere oor ‘n tydperk in St. Helenabaai en Elandsbaai uitgespoel het, waarsku die departement van bosbou, visserye en omgewing dat dit nie geëet moet word nie.
Luidens ‘n verklaring deur dié departement (DFFE) het die diere waarskynlik verlam geraak en het toe uitgespoel. Hierdie sterftes is vermoedelik deur die skadelike rooigety veroorsaak wat algemeen in die somer en herfs langs die Weskus voorkom. Alhoewel die rooigety kleurloos is en nie sigbaar vir die menslike oog nie, bevat dit neurotoksiene wat die vergiftiging kan veroorsaak en uiters gevaarlik is vir mense. Die departement waarsku dat alle skulpdiertjies, ongeag of dit uitgespoel is of van die strand of onderwater versamel word, nie geëet moet word nie.
Die DFFE sal die situasie aanhou monitor om die omvang van die rooigety en die sterftes van marienelewe langs die Weskus te bepaal.
