ZIMBABWE. – Altesame 67 plase wat in 2000 onder die destydse pres. Robert Mugabe van wit boere onteien is, gaan aan eienaars in vier Europese lande teruggegee word.
Anxious Masuka, die landbouminister, het die parlement ingelig dat die proses reeds aan die gang is, aangesien die plase onder ‘n internasionale bilaterale beleggingsbeskermingsooreenkoms val. Die betrokke lande is Denemarke, Switserland, Duitsland en Nederland. Die stap word beskou as deel van ‘n breër strategie om internasionale beleggersvertroue te herstel en toegang tot globale finansiële markte te verkry. Die onteiening het kommersiële landbou verwoes, tot ‘n geldeenheid-ineenstorting in 2008 gelei, en het die land in ‘n voedselkrisis gedompel.
Benewens die teruggee van die plase, sal Zimbabwe ook vergoeding van $146 miljoen betaal om eise van betrokke eienaars te skik. Pres. Mnangagwa het reeds in 2020 ‘n skikkingsooreenkoms van $3,5 miljard met sowat 4 000 wit boere onderteken, maar die regering het gesukkel om dit te betaal.
Bronne: CNBC Africa, Nyasa Times, ZimGazette
