GAUTENG. – Altesaam 11 polisielede verskyn vandag op aanklagte van korrupsie, diefstal, afpersing, opsetlike saakbeskadiging en regsverydeling in die Vereeniging-landdroshof.
Ian Cameron, parlementslid en voorsitter an die portfoliokomitee, sê die provinsiale teenkorrupsie-eenheid het die polisielede gearresteer. Sommige is senior offisiere, verbonde aan Sedibeng-distrik, Evaton- en Meyertonpolisiestasies, asook die Gauteng-hoofwegpatrollie.
Die saak spruit voort uit ‘n insident op 4 Julie 2021, toe die eienaars van ‘n drankwinkel, ‘n Chinese burger en sy pa, na bewering deur polisiebeamptes in ‘n ongemerkte voertuig in Meyerton voorgekeer is. Hulle is glo na die drankwinkel gedwing waar drank ter waarde van R600 000 geneem is, maar nie in die polisiesisteem ingeboek is nie. R700 000 is glo ook gesteel. Gedurende die beweerde misdaad is toesigstelsels vernietig en ‘n hardeskyf is ook geneem. Die slagoffers is glo ook van omkopery beskuldig en geboei.
Cameron sê voorts een van die beskuldigdes is ook verlede jaar vir ander beweerde misdade gearresteer en is blykbaar aan ‘n voormalige distrikskommissaris in Gauteng verwant.
Die name van die beskuldigdes sal eers nadat hulle in die hof verskyn het, bekend gemaak word.
