Twee mans is in afsonderlike voorvalle in Mpumalanga en KwaZulu-Natal in hegtenis geneem nadat die nasionale raad van dierebeskermingsverenigings (NDBV) hulle ondersoek verbind het met die beweerde seksuele mishandeling van honde en bokke.
Die NDBV sê deursoekingslasbriewe is by eiendomme in Volksrust en Mahlabatini uitgevoer ná maande se ondersoek en op grond van inligting wat ontvang is. Altesaam twee honde en 15 bokke is in die organisasie se sorg geneem. In Volksrust het inspekteurs twee honde op ‘n eiendom aangetref, waarvan een ooreenstem met die hond in ‘n video waaroor die vereniging beskik. Die diere is na ‘n veilige plek geneem waar ‘n veearts forensiese ondersoeke uitgevoer het. Die verdagte is in hegtenis geneem en bly in aanhouding. Die saak is vir verdere ondersoek tot 27 Julie uitgestel.
In die tweede voorval in Mahlabatini is 15 bokke op ‘n eiendom gevind en verwyder. Volgens die NDBV dui die beskikbare bewyse daarop dat minstens drie van die bokke seksueel mishandel is. Die verdagte, ‘n onderwyser, is aanvanklik in hegtenis geneem, maar is later vrygelaat nadat die beheer-aanklaer besluit het om die saak voorlopig nie op die hofrol te plaas nie, hangende verdere polisiewerk. Die verdagte sal na verwagting later gedagvaar word.
‘n Moontlike verband tussen die twee verdagtes word ondersoek. Senior inspekteur Arno de Klerk sê sulke ondersoeke neem dikwels maande en is grootliks afhanklik van inligting uit die publiek. “Ons sien ‘n toename in gevalle van seksuele mishandeling van diere. Ons doen ‘n beroep op die publiek om enige vermoedens aan te meld sodat ons kan optree.” Alhoewel geen verdere besonderhede in hierdie stadium deur die NDBV bekend gemaak gaan word nie, duur die ondersoek voort.
