KWAZULU-NATAL. – Twee verdagtes wat gesoek is in verband met ’n skietvoorval op 6 Januarie by Ezimangweni in Inanda waarin twee mense dood is, is Woensdagmiddag by Amaoti tydens ‘n skietgeveg met die polisie noodlottig gewond.
Luidens ‘n verklaring van polisiewoordvoerder, kol. Robert Netshiunda, het beamptes ’n woning in Amaoti genader, nadat vyf ander verdagtes reeds vir die saak in hegtenis geneem is. Met die polisie se aankoms het die verdagtes glo op hulle losgebrand. Die polisie het teruggeskiet en die verdagtes noodlottig gewond.
Die polisie sê twee vuurwapens is op die toneel gevind en sal vir ballistiese ontleding gestuur word.
