GAUTENG. – ‘n Tweede verdagte is Sondag deur die onafhanklike polisieondersoekdirektoraat (Opod) in hegtenis geneem in verband met die beweerde onwettige beslaglegging op edelstene tydens ‘n klopjag in Killarney, Johannesburg, in 2023. Behalwe vir ‘n sakeman is al die verdagtes wetstoepassingsbeamptes.
Lizzy Suping, Opod-woordvoerder, sê die verdagte het hom kort ná 18:00 by die Edenvale-polisiestasie aan die polisie oorgegee. Twee van die drie lasbriewe vir inhegtenisneming is nou uitgevoer, terwyl ondersoekers steeds na die derde verdagte soek. Die twee verdagtes sal na verwagting vandag in die Johannesburg-landdroshof voorkom.
Volgens Opod het die ondersoek aanvanklik op ses verdagtes gefokus, maar een van hulle is intussen oorlede. Van die oorblywende vyf is drie lede van die Ekurhuleni-metropolisie (EMPD), een ‘n lid van die Johannesburg-metropolisie (JMPD) en die vyfde ‘n sakeman wat hom glo tydens die klopjag as ‘n polisiebeampte voorgedoen het.
Opod sê die inhegtenisneming van die laaste twee verdagtes word binnekort verwag. Al die verdagtes staan tereg op aanklagte van korrupsie wat spruit uit hul beweerde onwettige optrede tydens die klopjag en beslaglegging op die edelstene.
