NOORDWES. – Vier mans, tussen 21 en 37 jaar oud, is Woensdag deur ’n gespesialiseerde polisie-eenheid naby Mahikeng in hegtenis geneem, nadat inligting ontvang en ondersoek is. Die inhegtenisnemings spruit uit die skietdood van Sergio en Marlene Gomes in Golfview toe hulle na die Tobola-slaghuis is om hul seun tydens ‘n beweerde rooftog by te staan.
Polisiewoordvoerder, kol. Adéle Myburgh, sê twee van die verdagtes word direk met die moord op ’n egpaar en ’n sakeroof verbind, terwyl al vier aangekla word van die onwettige besit van vuurwapens en ammunisie. In totaal is daar op vier vuurwapens beslag gelê, waarvan een aan ’n slagoffer behoort het en een as ’n speelgoedwapen geïdentifiseer is. Die polisie verwag dat nog verdagtes moontlik aangekeer kan word terwyl die ondersoek voortduur.
Een van die slagoffers het aan die polisie vertel dat ses gewapende gemaskerde mans die huis binnegegaan het terwyl hulle in ’n sitkamer was. Die groep het glo die slagoffers gedwing om op die grond te lê, hulle gedreig en aangerand. Daarna is selfone, ’n onbekende bedrag kontant, ’n skootrekenaar en die sleutels van ’n Ford Ranger gebuit. Die bakkie is daarna deur die verdagtes gebruik om van die toneel te vlug, waarna dit Saterdagoggend verlate in die Magogwe-omgewing opgespoor is. Van die gesteelde selfone is in die veld daar naby gevind.
Die verdagte mans sal in die Mmabatho-landdroshof verskyn, waarna Myburgh hulle sal identifiseer.
