MPUMALANGA. – Vier mense is Maandagmiddag dood in ‘n botsing tussen nege voertuie op die R555 naby Middelburg. Paramedici het die slagoffers op die toneel dood verklaar.
Altesaam nege voertuie, waaronder die vragmotor, vier ligte afleweringsvoertuie, ‘n sportnutsvoertuig en ander motorvoertuie, was by die botsing betrokke. Moeti Mmusi, woordvoerder van die departement van gemeenskapsveiligheid, sekuriteit en skakeling, sê ‘n vragmotor wat van Middelburg na Emalahleni (Witbank) onderweg was, het vermoedelik beheer verloor en teen een van die voertuie gebots. Verskeie ander voertuie het daarna in mekaar vasgery en ook teen staal gebots wat van die vragmotor afgeval het. Die vragmotor het met die impak aan die brand geslaan.
Vyf mense het ernstige beserings opgedoen, terwyl nog drie lig beseer is. Die beseerdes ontvang mediese behandeling by hospitale in Middelburg en Emalahleni.
Die oorsaak van die botsing word ondersoek.
Foto’s bo: SA Truck King
