KWAZULU-NATAL. – Agt mense, insluitend vyf kinders tussen vier en vyf jaar oud, is dood en nog twee persone is kritiek beseer toe ’n bakkie met 10 insittendes Sondagaand op die N2 naby die Scottburgh-afrit teen die agterkant van ‘n vragmotor gebots het.
Volgens Kelsey-Jae Meyrick van IPSS Medical Rescue het paramedici twee oorlewendes in ’n kritieke toestand op die toneel aangetref. Die oorblywende agt persone, waaronder die kinders, is op die toneel dood verklaar. Die twee beseerdes is op die toneel gestabiliseer en daarna onder die sorg van gevorderde lewensondersteuningsparamedici na ’n nabygeleë hospitaal vervoer.
IPSS Medical Rescue bedank Umdoni-brandweer, RTI, Gladiator Fire, EMRS en die plaaslike SAPD vir hul bystand op die toneel.
