GAUTENG. – Die Stad Tshwane se nooddiensdepartement het saam met die Suid-Afrikaanse Rooikruisvereniging ’n projek van stapel gestuur om rookverklikkers in die Kameeldrift-Oos- informele nedersetting te installeer.
Lindsay Zwelithini Mnguni, departementele woordvoerder vir Tshwane, sê in ‘n verklaring as deel van die inisiatief sal die rookverklikkers in strukture van kwesbare huishoudings van onder andere bejaardes, kind-geleide gesinne en persone met gestremdhede aangebring word. Daarbenewens word omvattende brandveiligheidsassesserings en bewusmakingsveldtogte aangebied om inwoners oor brandvoorkoming en noodvoorbereiding op te voed.
Die program sluit interaktiewe sessies met nooddienspersoneel in, waar inwoners kan leer oor loopbaanmoontlikhede en kundigheid binne die nooddienssektor. Praktiese demonstrasies oor behoorlike ontruimingsprosedures tydens noodgevalle word ook gegee. Die primêre doelwit van die projek is om gemeenskapsveiligheid te verbeter en brandrisiko’s te verminder deur ’n kultuur van veiligheid te bevorder.
Die inisiatief sal Donderdag 4 September 2025 tussen 09:00 en 13:00 in die Kameeldrift-Oos- informele nedersetting plaasvind.
