NOORD-KAAP. – Polisielede van ZF Mgcawu-distrik het Vrydag verskeie suksesse met Operasie Vala Umgodi gehad, waartydens onder meer sewe ongelisensieerde rewolwers by verdagtes gevind is.
Sers. Molefi Shemane sê die lede, onder leiding van lt.kol. Boitumelo Seleke, het op onwettige mynery en ander verwante misdade gefokus. Stop en deursoeking in Marantheng het gelei tot die inhegtenisneming van drie verdagtes wat die sewe vuurwapens in hulle besit gehad het. Vier Taurus .38 Special-rewolwers en drie Rossi .38 Special-rewolwers is gekonfiskeer. Die verdagtes kon nie geldige vuurwapenlisensies vir die vuurwapens gee nie en is vir die besit van ongelisensieerde vuurwapens in hegtenis geneem.
Met inligting oor dwelmverwante misdaad in Boichoko, Newon in Marantheng, is ‘n verdagte (48) in hegtenis geneem nadat Mandrax-tablette en dagga glo in sy besit gevind is. Die lede het ook op selfone beslag gelê.
Die verdagtes sal na verwagting in die Postmasburg-landdroshof verskyn.
