VRYSTAAT. – ‘n 80-jarige man is in hegtenis geneem nadat die polisie ‘n wenk ontvang en die liggaam van ‘n jong man op 20 Augustus op ‘n plaas tussen Kroonstad en Welkom begrawe aangetref is.
Brig. Motantsi Makhele, polisiewoordvoerder, sê in ‘n verklaring ‘n Bloemfontein-taakspan het die wenk opgevolg, waarna die liggaam in ‘n gevorderde toestand van ontbinding gekry is. DNS-monsters is geneem om die oorledene se identiteit te bevestig. ‘n Saak van moord en regsverydeling word ondersoek.
Die bejaarde man sal binnekort in die hof verskyn. Die polisie het aangdui dat verdere inhegtenisnemings moontlik is.
“Ons doen ’n beroep op die gemeenskap om toe te laat dat die ondersoek op ’n bewys-gedrewe manier voortgaan en om nie ongeverifieerde inligting te versprei wat die saak kan benadeel nie,” het Makhele bygevoeg.
