MPUMALANGA. – ‘n Sakerower (18), wat na bewering Vrydagoggend omstreeks 01:00 ‘n spazawinkel van ‘n buitelandse burger in Thuthukani geteiken en beroof het, is binne ure deur patrolleerders van Standerton se gemeenskapspolisiëringsforum aangekeer. Hy is daarna in hegtenis geneem.
Kol. Donald Mdhluli sê volgens inligting het die eienaar geslaap en ‘n geluid gehoor. Hy het ondersoek ingestel, waarna hy oorval, met ‘n handwapen aangerand en van ‘n onbekende bedrag geld en twee selfone beroof is.
Omstreeks 06:00 het GPF-patrolleerders inligting van die beweerde sakeroof ontvang en een van die verdagtes met ‘n vuurwapen in sy besit opgespoor. Die verdagte is in hegtenis geneem en deur die polisie vir die sakeroof en besit van ‘n ongelisensieerde vuurwapen aangekla.
Mdhluli sê die polisie is op soek na nog twee verdagtes en versoek die publiek om met inligting vorendag te kom. Inligting kan vertroulik gegee word.
