’n Kouefront wat Dinsdag oor die suidweste van die land sal beweeg, hou die moontlikheid van reën veral vir die Wes-Kaap in.
Volgens die Suid-Afrikaanse weerdiens sal daar verspreide donderbuie in die suidweste van die Wes-Kaap voorkom. Die gebied tussen Plettenbergbaai en Gqeberha kan geïsoleerde buie verwag.
’n Geelvlak 2-waarskuwing van sterk winde is vir die area tussen De Aar, Beaufort-Wes en Graaff-Reinet uitgereik.
Die kouefront sal teen Woensdag verby die land beweeg en op sy pad ooswaarts reën vir die suid- en ooskus bring. Kouer temperature sal met die reënval gepaardgaan.
Teen Donderdag sal die kouer temperature met meer gematigde temperature vervang word.
Bron: SAWS
