KAAPSTAD, WES-KAAP. – ’n Hond is onlangs uit ’n vullisdrom in die Grassy Park-woonbuurt in Kaapstad gered.
Volgens Kaapstad se Dierebeskermingsvereniging het hulle ’n klagte van ’n bekommerde inwoner ontvang van ’n hond wat in ’n vullisdrom aangehou word.
Inspekteur Werner Taljaard het gaan ondersoek instel. By die perseel het hy op ’n swart vullisdrom vol reënwater afgekom. Tjankgeluide het hom na ’n bedekte staalvullisdrom ’n ent verder gelei.
Hy het ’n stuk hout van die vullisdrom af verwyder en ’n hondjie saam met ’n stuk materiaal, ’n NikNaks-sakkie en ’n teddiebeer in die vullisdrom aangetref.
Die hond is Nik Nax genoem. Volgens Taljaard het sy met haar stert tussen haar bene haarself klein probeer maak. Hy het haar uit die vullisdrom verwyder, maar kon dit nie oor sy hart kry om haar in die gebruiklike DBV-hok agter in sy voertuig te laai nie.
Sy het op die passasiersitplek saam met hom na die kantoor gery.
Ondersoek is aan die gang na die omstandighede waarin sy aangehou is. Haar eienaar word deur moontlike aanklagte van dieremishandeling in die gesig gestaar.
Die Cape of Good Hope het die volgende foto’s en video op hulle sosiale media geplaas:
Bron: CAPE SPCA, TikTok
