OOS-KAAP. – Twee persone het Saterdag gesterf toe drie voertuie omstreeks 18:15 op die R334 Rockland/ Uitenhagepad in ‘n ongeluk betrokke was na vermoedelik vir beeste uitgeswenk is.
Kapt. Sandra Janse van Rensburg sê Kariega-speurders ondersoek ‘n saak van strafbare manslag.
Na bewering het die bestuurder alleen in ‘n Avanza in die rigting van Kariega gereis. Hy het glo probeer om beeste in die pad te vermy en trompop met die VW Golf gebots. ‘n VW Polo het glo daarna in die agterkant van die VW Polo vasgery.
Die onbekende bestuurder van die Avanza en ‘n vrou (30) in die VW Golf het op die toneel gesterf, terwyl die bestuurder van die VW Golf vir mediese behandeling na ‘n hospitaal vervoer is.
