POTCHEFSTROOM, NOORDWES. – Shaun Christie, ’n vierdejaarstudent aan die Noordwes-Universiteit (NWU) se Potchefstroom-kampus, is onskuldig bevind aan haatspraak nadat hy aan die begin van die jaar ’n oriënteringsprogram ontwrig het.
Christie is net skuldig bevind op die aanklag dat hy ’n universiteitsprogram ontwrig het. Hy was vir weke deel van ’n dissiplinêre verhoor nadat hy aanvanklik in Januarie tydelik geskors is. Sy skorsing is gedeeltelik opgehef sodat hy klasse kon bywoon.
Hy het hom tydens die oriënteringsessie van die eerstejaars uitgelaat oor Christene wat nie veilig voel om oor hulle geloof te praat nie, maar dat daar ruimte gebied word om oor genderkwessies te praat.
Ronald Peters, bestuurder van AfriForum Jeug, wat namens Christie opgetree het, sê hulle is dankbaar dat hy sy studies kan voortsit en hulle is tevrede met die uitslag.
Christie sê hy het dit nie vir homself gedoen nie. “Ek het hierdie nie vir myself gedoen nie, maar vir diegene wat nie ’n stem het nie, vir die toekomstige geslagte en vir die toekoms van die onderwysstelsel in Suid-Afrika.
Nuusflits het voorheen só oor die voorval berig.
Bron: AfriForum
