POTCHEFSTROOM, NOORDWES. – Shaun Christie, ’n senior regsstudent aan die Noordwes-Universiteit (NWU) wat tydens ’n oriënteringsessie beswaar teen die inhoud gemaak het, se dissiplinêre verhoor begin vandag.
Christie is aanvanklik op 7 Februarie, ’n dag na die voorval in die amfiteater, tydelik geskors. Sy skorsing is egter op 13 Februarie gedeeltelik opgehef. AfriForum Jeug tree as Christie se verteenwoordiger op.
Die NWU het vroeër aangekondig Christie word op vyf aanklagte van wangedrag aangekla.
Die vyf aanklagte is:
- Haatspraak – hy het glo studente aangehits om teen die LGBTQIAP+-gemeenskap op te staan.
- Die ontwrigting van ’n universiteitsprogram.
- Die skend van die regte van die spreker, Chloe Valerie van der Walt.
- Die skuldig maak aan die vyandige behandeling van die LGBTQIAP+-gemeenskap.
- Die wederregtelike en valse uitlating rakende die NWU se beweerde onverdraagsaamheid teenoor Christelike waardes.
Ronald Peters, AfriForum Jeug-bestuurder, meen die universiteit misken Christie se reg tot vryheid van spraak en assosiasie deur die genoemde aanklagtes teen hom te bring.
Christie se verhoor sal na verwagting drie dae duur.
Bronne: AfriForum Jeug, NWU
