MPUMALANGA. – Nkosikhona Ntshalintshali (36), ‘n reeksverkragter, is in die Breyten-hooggeregshof vir lewenslank en addisioneel nog 110 jaar tronk toe gestuur. Ntshalintshali is skuldig bevind aan verkragtings in Piet Retief gepleeg.
Monica Nyuswa, woordvoerder vir die NVG, sê die beskuldigde het skuldig gepleit, waarna hy op vier aanklagte van verkragting, vier aanklagte van roof met verswarende omstandighede, twee aanklagte van ontvoering en twee aanklagte van huisbraak met die doel om ‘n misdaad te pleeg, gevonnis is. Die misdade is tussen November 2008 tot Junie 2009 gepleeg. Ntshalintshali sou by slagoffers se huise inbreek, hulle met ‘n mes dreig en van waardevolle items beroof. Ander slagofers is weer in die straat oorval en na verlate plekke gesleep. Somtyds is die slagoffers aangerand. Hy het glo saam met twee onbekende makkers gewerk.
Die polisie het hom in 2020 in hegtenis geneem toe hy deur DNS aan misdade gekoppel is. Met bewyse teen hom het Ntshalintshali besluit om skuldig te pleit. Slagofferimpakverklarings is aan die hof voorgehou. Hy is skuldig bevind, gevonnis en onbevoeg verklaar om ‘n vuurwapen te besit.
“Hierdie vonnis is ‘n getuienis van ons toewyding in die stryd teen die plaag van geslagsgebaseerde geweld in ons gemeenskappe en dit bring afsluiting vir die slagoffers en hul gesinne” sê Sonja Ntuli, die waarnemende direkteur van openbare vervolging in die provinsie.
