GAUTENG. – Jude Yaya Oka en Evans Akor Tiku, burgers van Kameroen, het Woensdag vir die beweerde vervaardiging van vervalste SA- en VSA-valuta in die Pretoria-landdroshof verskyn.
Kapt. Lloyd Ramovha het bevestig dat verskeie eenhede van die polisie, insluitend die Valke en die honde-eenheid, saam met die Suid-Afrikaanse Reserwebank ‘n gesamentlike operasie uitgevoer het nadat inligting oor die kriminele bedrywighede ontvang is.
“Die span het op ‘n perseel langs Ferreirastraat, Foutnants Residetnial Estates, in Silver Lakes, in Pretoria, toegeslaan.”
Twee verdagtes is ondervra, waarna ‘n selfbergingseenheid deursoek is. Tydens die ondersoek het die polisie op swart plastieksakke afgekom wat die verdagtes besig was om in ‘n nabygeleë voertuig te laai.
Vervalste Suid-Afrikaanse en Amerikaanse valuta, asook ‘n drukker wat vir die produksie gebruik is, is op die toneel gekonfiskeer. Die verdagtes staan tereg op aanklagte van die oortreding van die Valutawet en die Reserwebankwet.
Die saak is vir ‘n borgaansoek tot 10 September uitgestel.
