GAUTENG. – Die polisie van Pretoria-Moot ondersoek drie sake van moord en ‘n geregtelike doodsondersoek nadat ‘n man (47) glo eers sy vrou (45) tuis en daarna twee werknemers by ‘n sake-onderneming doodgeskiet het. Hy het daarna glo sy eie lewe geneem.
AO Johan van Dyk sê die polisie is omstreeks 11:30 na twee skietinsidente ontbied. Op die eerste toneel by ‘n huis in ‘n kompleks in Rietfontein is ‘n vrou met skietwonde aan haar kop dood verklaar. Op die tweede toneel, by ‘n supermark en winkel vir wegneemetes in Gezina, het die polisie drie liggame wat noodlottige skietwonde opgedoen het, aangetref.
“Voorlopige ondersoeke het aan die lig gebring die eienaar van die winkel het ‘n argument met sy werknemers gehad nadat hulle die winkel vroeër die oggend oopgemaak. Hy is daarna na sy huis toe.”
Van Dyk sê by die huis in Rietfontein het die man na bewering sy vrou noodlottig met sy vuurwapen gewond. Hy is daarna na die supermark waar hy twee werknemers, ‘n man (39) en ‘n vrou, doodgeskiet het. Hy het daarna homself om die lewe gebring.
“’n 9 mm-pistool wat by die supermark gevind is, is deel van die voortgesette ondersoek.”
