GAUTENG. – Twee “edelmetaalhandelaars” wat glo Dinsdag probeer het om ses stawe onbewerkte goud te verkoop, is deur die Valke in hegtenis geneem en daar is op die goud beslag gelê.
Kapt. Lloyd Ramovha van die Valke sê Joacham Chivayo (33), ‘n Zimbabwiese burger, en Ayanda Brian Gungwa (20) is omstreeks 13:15 by Helderwyk-landgoed vir die beweerde onwettige besit van goud gearresteer. Hulle is ook van oortreding van die wet op edelmetale aangekla. Die stawe goud is ongeveer R15 m. werd.
Brakpan-polisie ondersoek die saak. Die verdagtes het Woensdag vir die eerste keer in die hof verskyn en bly in aanhouding.
Die ondersoek na die oorsprong van die goud duur voort, ook om moontlik nog addisionele verdagtes in die onwettige handel van goud te identifiseer.
