GAUTENG. – ‘n Pasgeborene is Saterdag in Diepsloot uit ‘n puttoilet gered. Die gemeenskap het die ma uitgewys, waarna sy (19) en die baba vir mediese behandeling na die Rahima Moosa Mother and Child Hospital geneem is.
Supt. Xolani Fihla, woordvoerder vir die Johannesburg-metropolisie (JMPD), sê beamptes het op ‘n noodroep van ‘n gemeenskapslid reageer oor ‘n baba wat in ‘n geventileerde, verbeterde puttoilet in Uitbreiding 11 gevind is. Met aankoms op die toneel is hulle deur inwoners saam met die Stad Johannesburg se noodbestuurspan na die ma gelei.
Fihla sê die vrou het tydens ondervraging erken sy het die baba in die toilet gesit. Die ma en baba is daarna vir mediese hulp geneem. Die insident word deur die relevante wetstoepassingsowerhede ondersoek.
