WES-KAAP. – Die polisie ondersoek ‘n saak van brandstigting nadat minibustaxi’s Sondagaand by die Nyanga-taxistaanplek aan die brand gesteek is. Bykomende polisie-sigbaarheid, is ook ontplooi.
Brig. Novela Potelwa sê die plaaslike polisie en brandweer is na die toneel ontbied en het die voertuie in vlamme aangetref. Drie minibustaxi’s is totaal verbrand en 13 is beskadig. Brandstigting word deur die polisie ondersoek. Geen arrestasies is tot dusver gemaak nie.
Potelwa sê die addisionele lede sal in die gebied bly totdat kalmte herstel is. Die taxi-staanplek is vir pendelaars se gebruik oop gehou.
