VRYSTAAT. – Tussen 2021 en 2025 het 29 polisiebeamptes in dié provinsie hulle eie lewens geneem. Hierdie syfer is deur Jabu Mbalula, LUR vir gemeenskapsveiligheid, paaie en vervoer, op ‘n vraag in die Vrystaatse Wetgewer bevestig.
Roy Jankielsohn, die DA-woordvoerder vir gemeenskapsveiligheid in die Vrystaatse Wetgewer, het gesê die syfers is ’n aanduiding van die toestand van polisie-ondersteuning in die provinsie. Volgens Jankielsohn toon oorsigbesoeke aan polisiekantore en gesprekke met individuele lede dat hulle onder baie stresvolle omstandighede werk. Hy het gesê van beamptes word verwag om resultate te lewer terwyl hulle met onvoldoende hulpbronne soos voertuie, rekenaars, drukkers en basiese toerusting werk.
“Ons beamptes werk in geboue wat vervalle is en professionaliteit ondermyn. Hulle word dikwels aan afknouery, viktimisasie en ’n gebrek aan empatie van senior bestuur blootgestel,” het Jankielsohn gesê.
Hy het verder verwys na uitdagings soos ’n tekort aan traumabestuur en vroeë aftreepakkette, ’n gebrek aan bevorderingsgeleenthede, nepotisme, ongeskikte seniors, lang ure, gedwonge oorplasings en druk op gesinne.
Jankielsohn het gesê speurders dra gemiddeld 395 dossiere elk, terwyl die ideale aantal 100 per persoon behoort te wees. Hy het ook verwys na die gewelddadige en negatiewe werksomgewing waarin beamptes daagliks met misdaadtonele, slagoffers en misdadigers gekonfronteer word, asook die gebrek aan voortdurende opleiding en ondersteuning.
“Dit is duidelik dat dringende ingryping nodig is om waardigheid, ondersteuning en professionaliteit binne die SAPD te herstel. Dit moet verseker dat diegene wat inwoners beskerm, nie self deur die stelsel verlate en gebreek gelaat word nie,” het Jankielsohn gesê.
