Ek hoop ek vind jou vandag op ’n goeie plek in jou lewe. Maar ek weet hierdie wêreld is rof, en niemand van ons kom lewendig anderkant uit nie. Jy word soms hard geslaan en vind jouself dikwels op die grond – moeg, seer en uitgeput. As dit jou beskryf, dan is vandag se boodskap vir jou bedoel.
Het jy geweet dat wanneer jy ’n tennisbal op ’n sagte rusbank gooi, dit skaars sal hop? Maar vat daardie selfde bal en gooi dit teen ’n harde vloer, dan bons dit sommer hoog die lug in! Wat leer ons hieruit? Hoe verder en harder jy val, hoe beter is die kans om jouself weer op te lig en nuwe hoogtes te bereik. Min mense verander in hul gemaksone, maar wanneer jy tot op die rotsbodem gedaal het, is daar die geleentheid vir groot aanpassings.
’n Onoorwonne bokser kan op ’n dag platgeslaan word en sy eerste geveg verloor. Só ’n nederlaag kan drasties wees, en hy mag dalk nooit herstel nie. Maar hy sit met twee keuses: gaan hy sy droom laat vaar en iets anders met sy lewe doen, of gaan hy opstaan en daaruit leer om beter te word? As hy nog altyd net gewen het, was dit nooit nodig vir groot veranderinge in sy lewe nie. Hoe sê hulle? “As dit nie gebreek is nie, hoekom wil jy dit regmaak?”
Maar ná ’n groot nederlaag kan daar groot veranderinge kom: dalk ’n nuwe afrigter, ’n beter dieet, meer fiksheid en minder slegte gewoontes buite die kryt.
Kom ons kyk na een van die grootste sogenaamde nederlae in die geskiedenis van hierdie wêreld: die kruis! God het mens geword en onder ons kom woon. Ek reken die duiwel het gedink hy het uiteindelik ’n kraak in die wapenrusting van God gevind. As hy net Sy enigste Seun kon doodmaak, sou die aarde aan hom behoort. Min het hy geweet dat die grootste nederlaag in die grootste oorwinning sou verander! Nie net het Jesus opgestaan uit die dood nadat Hy dit oorwin het nie, maar Hy het ook opgevaar na die hemel en die weg geopen vir elkeen van ons wat glo, sodat ons Hom kan volg. Wat ’n ommekeer!
Dus, as jy vandag voel dat jy die allerlaagste punt bereik het, onthou: dit kan die beste springplank wees om nuwe hoogtes te bereik. Glo in God, vertrou op Hom, en vra Hom om jou uit die donker put te help.
Romeine 8:28: “En ons weet dat vir hulle wat God liefhet, alles ten goede meewerk – vir hulle wat na sy voorneme geroep is.”
Jesaja 40:31: “Maar die wat op die Here wag, kry nuwe krag; hulle vaar op met vleuels soos arende; hulle hardloop en word nie moeg nie, hulle wandel en word nie mat nie.”
