KWAZULU-NATAL. – Vyf verdagtes, tussen die ouderdomme van 17 en middel 20’s, is vanoggend (Maandag), in ’n skietgeveg met die polisie by die Pump House-informele nedersetting in Chatsworth doodgeskiet.
Kol. Robert Netshiunda, polisiewoordvoerder, sê in ‘n verklaring inligting het die polisie na die verdagtes se skuilplek gelei. Die verdagtes was in verband met sake van moord, huisrowe, afpersing en die besit van onwettige vuurwapens in die gebiede Mpumalanga-township, Mariannhill, KwaNdengezi en Umsunduzi gesoek. Met dié wat die polisie hulle teenwoordigheid by die skuilplek bekend gemaak het, is daar glo op hulle geskiet. ’n Skietgeveg het gevolg waartydens al vyf verdagtes noodlottig gewond is. Geen polisiebeampte is beseer nie.
Drie vuurwapens, waaronder ’n selfgemaakte wapen, is by die verdagtes gevind.
