AfriForum se privaatvervolgingseenheid het die departement van hoër onderwys se versuim om op te tree teen beweerde korrupsie by Unisa as ’n voorbeeld van dubbele standaarde beskryf.
Vir byna 18 maande het die eenheid beweerde wanbestuur en magsmisbruik by Unisa blootgelê en personeel beskerm wat ondersoek ingestel het. Dr. Reshma Mathura, Unisa se waarnemende hoof- finansiële beampte, is verlede jaar geskors nadat hy wettiglik saam met die Valke aan ’n ondersoek na korrupsie deelgeneem het, maar steeds geskors bly al is hy van alle oortredings vrygespreek.
AfriForum het vroeër Blade Nzimande, vorige minister van hoër onderwys, versoek om by Unisa in te gryp, maar dié versoek is glo geïgnoreer. Nou hoop die eenheid dat Buti Manamela, minister van hoër onderwys en opleiding, wat onlangs ’n taakspan by die Kaapstad-kollege ingestel het, soortgelyke stappe by Unisa sal neem.
AfriForum-woordvoerder Barry Bateman sê dit lyk asof ondersoeke teen groot koste gedoen word, maar begrawe word as dit ongunstig is vir die bestuur, veral as dit teen die visekanselier, Puleng LenkaBula, is. Hy sê die praktyk waarvolgens personeel wat korrupsie blootlê, gestraf word, blyk wydverspreid te wees en dat die regering nie fluitjieblasers beskerm nie.
Nuusflits het kommentaar van Unisa gevra.
Druk hier om meer te lees.
